ஆடுதின்னாப்பாளை Aristolochia bracteolate Aristolochiaceae

மாற்றுப்பெயர் ; ஆடு தீண்டாப் பாளை, கத்திருயம், புழுக்கொல்லி, பங்கம், பங்கம் பாளை, வாத்துப் பூ.
வளரியல்பு ;     தரையோடு படர்ந்து வளரும் சிறுசெடி
இலைஅமைப்பு ;   மற்றடுக்கில் வெள்ளைப் பூச்சுடைய முட்டைவடிவ சாம்பல் கலந்த நிறத்துடன் மடிப்புச் சுருளுடன், ஓரங்களில் கறுப்பு கலந்த பச்சையாக இருக்கும். கசப்பும், துவர்ப்பும் ஒருங்கே கொண்ட கிருமி நாசினித்தன்மையுடையது.இதன் மலர்களும் இதே நிறத்தை ஒத்து இருக்கும்.
பூ,காய் ;    முதிர்ந்த நிலையில் வெடித்துச் சிதறும் காய்
மருத்துவ பாகம் ;   சமூலம்.
குணம் ;   கிருமி நாசினி, பிரசவகாரி, முறைவியாதிரோதி, ருதுவர்தனகாரி. தமிழகத்தில் உள்ள எல்லா மாவட்டங்களிலும் கரிசல் நிலத்தில் வளர்கின்றது.

மருத்துவக் குணங்கள்:
"ஆடுதொடாப்பாளைக் ககக்கிருமி வன்சிலந்தி
நீடுகருங் குஷ்டம் நிறைகரப்பான் –ஆடிடச்செய்
யெண்பது வாய்வு மிகில்குஷ்ட முந்தீருந்
திண்பெறுநற் றாதுவுமாய் செப்பு"
(பதார்தகுண சிந்தாமணி)
மலாஸயக்கிருமி,சிலந்திப்பூச்சி விஷம்,கருங்குஷ்டம்,கரப்பான்,சர்வ வாத ரோகம், கிடிப குஷ்டம் நீங்கும்,சுக்கில விருத்தி உண்டாகும்.வயிற்றுப் பூச்சிக் கொல்லியாகவும், மாத விலக்கைத் தூண்டும் மருந்தாகவும், பேறு கால வலியை அதிகரிக்கும் மருந்தாகவும் பயன்படுகிறது.

இலைச் சூரணம் 2 சிட்டிகை வெந்நீரில் கலந்து குடிக்க, பாம்பு விஷம், சில்லறை விஷம், மலக் கிருமிகள், கருங் குட்டம், யானைத் தோல் சொறி குணமாகும்.
வேரை அரைத்து 2 வேளை 5 கிராம் வெந்நீரில் கொடுத்து கடும் பத்தியத்தில் இருக்கச் செய்ய 3 நாளில் எல்லா விதமான பாம்பு விஷமும் முறிந்து விடும். (புதுப்பானையில் உப்பில்லாத பச்சரிசிப் பொங்கல் சாப்பிடச் செய்து ஒரு நாள் முழுவதும் விஷம் தீண்டியவரை தூங்கவிடக் கூடாது.)
வேர் சூரணம் 10 கிராம் வெந்நீரில் கொடுக்க மகப்பேறு வலி நீங்கி சுகப் பிரசவம் ஆகும்.                                       
விதைச் சூரணம் 5 கிராம் எடுத்து விளக்கெண்ணெயில் கலந்து கொடுக்க நன்கு பேதியாகி வயிற்று வலி, சூதகத் தடை, மலக் கிருமிகள்,பிரசவ வேதனை,முறைக்காய்ச்சல் நீங்கும்.
இலைச்சாறு 10மிலி காலைமாலை,குடித்துவர ஒழுங்கற்ற மாதவிடாய் சீராகும். விட்டுவிட்டு வரும் காய்ச்சல் தீரும்.
இலையை அரைத்து கொட்டைப்பாக்களவு வெள்ளாட்டுப்பாலில் கலந்து குடிக்க சகல விஷம்,புண்,பிளவை,சிரங்கு,வங்கு,கரப்பான்,குஷ்டம் தீரும்.
இலையை நிழலில் உலர்த்திக் காய வைத்து இடித்துப் பொடியாக்கி ஒரு தேக்கரண்டியளவு 2 வேளை சாப்பிட்டு வர தோல் வியாதிகள், குட்டம், மலக்குடல் சம்பந்தமான வியாதிகள், சிறுநீரகத் தொற்றுகள் குணமாகும்.
சமூலம்,பறங்கிப் பட்டை, வெள்ளை மிளகு, பெரியா நங்கை, கீழாநெல்லி வகைக்கு சம அளவாக எடுத்து இடித்துப் பொடியாக்கி ஒரு தேக்கரண்டி அளவாக தொடர்ந்து 2 வேளை சாப்பிட்டு வர கருங்குட்டம், வெண்குட்டம், சிறுநீர் வழியில் புண், தோல் வியாதிகள், சர்க்கரை வியாதி குணமாகும்.
இலைச் சாறு, துளசிச்சாறு சம அளவாக 100 மில்லியளவு எடுத்து சிறிது மிளகுத் தூள் சேர்த்துக் குடிக்க சில வகையான விஷங்கள் முறியும்.
இலை 100 கிராம், மிளகு 10 கிராம் அரைத்து பட்டாணியளவு மாத்திரைகளாகப் உருட்டிக் காய வைத்து 2 வேளை ஒரு மாத்திரை வீதம் உண்டு வர மேக வாயு நீங்கும்.
சமூலம், வசம்பு சம அளவாக எடுத்து இடித்து கட்டியின் மேல் வில்லையாக வைத்து அதன் அளவிற்கு பானையோட்டை வட்டமாக நறுக்கி அதன்மேல் வைத்து இப்படியாக 3 நாள் கட்ட அரையாப்புக் கட்டி கரையும்.
வேர், கவிழ்தும்பை வேர், வெள்ளருகு வேர், மருக்காரைவேர் சமஅளவாக எடுத்து அரைத்து உடம்பில் பூசி முறுக்கித் துவட்ட, கருவழலை, தண்ணீர் பாம்பு முதலிய சில்லறை விஷங்கள் முறியும்.
சமூலத்துடன் கருங்குருவை நெல் சேர்த்தவித்து அவலிடித்து,தினம் வேளைக்கு 40 கிராம்,1மண்டலம் கொடுத்துவர சொறி சிரங்கு,குஷ்டம்,வங்கு, வண்டுக்கடி, அரணைக்கடி,செய்யான்கடி,பூரான்கடி முதலியவை நீங்கும். அப்போது மிளகை பால் விட்டரைத்து ஸ்நானம் செய்வது நன்று.3 மாதம்வரை ந.எண்ணை,கடுகு போகம் நீக்கவும்.
உலர்ந்த இலை 40-60கிராம்,அரை லி நீரிலிட்டு 150மிலியாகக் காய்ச்சி வடிகட்டி குடிக்க கிருமிகள் அழியும்.2-3முறை கொடுத்து பேதிக்கு கொடுக்க அழிந்த கிருமிகள் வெளியேறும்.
வேர் சூரணம் 5-10 கிராம் 50மிலி கொதிக்கும் வெந்நீரில் போட்டு அரைமணி நேரம் மூடிவைத்து வடித்துக் கொடுக்க குளிர் சுரம் நீங்கும்.பிரசவ வேதனை அதிகரித்து சுகப்பிரசவம் ஆகும்.
இலைச்சாறுடன் சமன் நல்லெண்ணை கலந்து காய்ச்சிப் பூச கருங்குஷ்டம், கரப்பான், சிரங்கு,சிலந்தி தீரும்.
வேரை பாம்பு விஷம் தீண்டியவரை மெல்லச் சொல்லி கடிபட்டவரின் வாய் ருசியை வைத்து எந்த வகையான பாம்பு தீண்டியது என்பதை எளிதாய் காணலாம்.

இளைப்பு -கொம்பேறி மூக்கன் பாம்பு,
இனிப்பு -நல்ல பாம்பு,
தலை நடுக்கம் -கட்டு விரியன் பாம்பு,
உணர்வு இல்லாமை -இருதலை மணியன் பாம்பு,
மூக்கு எரிச்சல் -செய்யான் பாம்பு,
கண் பஞ்சடைவது -மூஞ்செறி பாம்பு,
காது அடைப்பு -மூஞ்சுறி பாம்பு,
புளிப்பு -வழலைப் பாம்பு,
புளித்த பிறகு காரம் -கட்டு விரியன் பாம்பு அல்லது பெருவிரியன் பாம்பு,
முள்ளுக் கீரை சுவை -சீத மண்டலம் பாம்பு,
நாக்கு கடுகடுப்பு -சுருட்டைப் பாம்பு,
நெஞ்சடைத்தல் -கண் நஞ்சான் பாம்பு,
கண்பார்வை மங்கல் -கண் நஞ்சான் பாம்பு,
பல்லில் சூடேறினால் -செய்யான் பாம்பு.